ಅಳಿದು ಉಳಿದವರು (COVID ಇಂದ )

ನಿನ್ನೆ ನಾಳೆಗಳ ಅರಿವಿಲ್ಲ

ಆಗು ಹೋಗುಗಳ ಚಿಂತೆ ಇಲ್ಲ

ಮನೆ ಬಿಟ್ಟು ಹೋಗುವ ಹಾಗಿಲ್ಲ

ಮನದ ಗೂಡಲ್ಲಿ ಒಂಟಿಯೊ ಒಬ್ಬಂಟಿಯೋ ತಿಳಿದಿಲ್ಲ ।।

ಬಿಡುವಿಲ್ಲದೆ ಬದುಕಿದವರು , ಇಂದು

ಬಿಡದೆ, ಬಿಡುವಿನಲ್ಲಿ ಬಿದ್ದಿರುವರು ,

ಬದುಕಲ್ಲಿ ಸಮಯವೇ ಇಲ್ಲ ಅನ್ನುವವರು , ಇಂದು

ಸಮಯ ಕಳೆಯುವ ಪರಿಯನ್ನು ಹುಡುಕುತಿರುವರು ।।

ಜೀವನದಲ್ಲಿ ಏನಾದರು ಮಾಡಬೇಕು , ಎಂದವರು

ಜೀವ ಉಳಿಸಿಕೊಳ್ಳುವುದೆ ಮುಖ್ಯವೆಂದು , ಮನೆಯಲ್ಲಿರುವರು ,

ಬಣ್ಣದ ಆಸೆ ಕಟ್ಟಿ ಊರು ಬಿಟ್ಟು ಬಂದವರು ,

ಬಿಟ್ಟು ಬಂದ ಊರಿಗೆ ಮತ್ತೆ ಮರಳುತಿರುವರು ।।

BAR' ನ ಮುಂದೆ Queue ನಿಂತವರೆ ದೊಡ್ಡವರು ,

ಮನೆಯಲ್ಲಿ ಕುಂತು NEWS ನೋಡಿದವರು ಭಯದಲ್ಲೇ ಸತ್ತರು ,

ಸಾಯುವವರ ಬದುಕಿಸಲು ಹೋರಾಡುತ್ತಿರುವ ವೈದ್ಯರೆ ದೇವರು,

ದೇವರಂತೆ ದೊಡ್ಡ POSTER ಗಳಲ್ಲಿ Pose ಕೊಡುತಿದ್ದವರು ಎಲ್ಲಿ ಹೋದರು ।।

ಮಾನವರಿಗೆ ಮಾರಿಯಾಗಿ ಬಂದದ್ದಾದರು ಏನು ?

ಬೇರೆ ಗ್ರಹದ ಜೀವಗಳಲ್ಲ ,

ಕನಸಲ್ಲೂ ಕಾಣದ ಭಯಾನಕ ರಕ್ಕಸನಲ್ಲ ...

ಕಣ್ಣಿಗೂ ಕಾಣದ ಸಣ್ಣ ರೋಗಾಣು ।।

ಪರ್ವತವನ್ನೇ ಪುಡಿ ಪುಡಿ ಮಾಡುವೆ ಎಂದು ,

ಹೆಚ್ಚು ಮೆರೆದ ಮಾನವನಿಗೆ ಇಂದು ,

ಕಾಣದ ಸಣ್ಣ ಅಣುವಿಗೆ ಅಡಗಿ ಕೂರುವ ಗತಿಯೇನು ?

ಕೊನೆಯಿರದಷ್ಟು ಕರ್ಮಗಳ ಫಲವ ಉಂಡೇ ತೀರಬೇಕು ನಾವೆಲ್ಲರು ।।

ಸೃಷ್ಟಿಯ ಮುಂದೆ ಯಾರು ಇಲ್ಲ ,

ಅವಳು ಮುನಿದರೆ ಯಾರು ಉಳಿಯುವುದೂ ಇಲ್ಲ ,

ಅವಳ ರುದ್ರ ತಾಂಡವದಲ್ಲಿ ಅಳಿಯದೆ ಉಳಿಯಬೇಕೆನ್ನುವವರು ,

ಈ ಭೂ ಮಾತೆಯ ಕೈ ಇಂದ ಜೀವ ಭಿಕ್ಷೆಯ ಬೇಡುತಿಹರು .

ಅವರೇ ಅಳಿದು ಉಳಿದವರು (COVID ಇಂದ )....

ನವೀನಸ್ಪೂರ್ತಿ

ಮನ್ವಂತರದ ಕವಿತೆಗಳು