ಕನ್ನಡದ ಕಂಪು

ಎಲ್ಲಾದರೂ ಇರು ಎಂತಾದರು ಇರು ಎಂದೆಂದಿಗೂ ನೀ ಕನ್ನಡ ವಾಗಿರು ಎಂದ ಮಹಾ ಕವಿ ಕುವೆಂಪು ರವರಿಗೆ ಈ ನನ್ನ ಪುಟ್ಟ ಕವನ ಅರ್ಪಣೆ ...

ಏನೆಂದು ಹಾಡಲಿ ಕನ್ನಡದ ಕಂಪಿನ ಕಥೆಯ

ಹೊಗಳಲು ನಿಂತರೆ ಯುಗಗಳೆ ಕಳೆವುದು

ಎಷ್ಟೆಂದು ಹೊಗಳಲಿ ಕರುನಾಡ ವೈಭವವ

ಸಾವಿರ ನಾಲಗೆಯಲ್ಲಿ ಸಂವತ್ಸರಗಳೇ ನುಡಿದರೂ ,

ಮುಗಿಯದು ಮೊದಲ ಪರ್ವವೂ ।।

ಸಹ್ಯಾದ್ರಿಯ ಸುಂದರ ಝರಿಗಳ ಜುಳು ಜುಳು ನಾದಕ್ಕೆ

ಗಿಳಿ ಕೋಗಿಲೆಗಳ ಚಿಲಿ ಪಿಲಿ ಗಾನವ ಕೂಡಿಸಿ ,

ಶ್ರೀ ಗಂಧದ ಸುಗಂಧವ ಬೆರೆಸಿ ,ತೇದು ಬಂದ ಅಮೃತ ಗಾನವೊಂದು ,

ಪದಗಳೊಡನೆ ಬೆರೆತು ,ಬಳುವಳಿಯಾಗಿ ಬಂದಿಹುದು ಕಸ್ತೂರಿ ಕನ್ನಡದ ರೂಪದಲ್ಲಿ ।।

ನುಡಿವವರೆಲ್ಲಾ ಕವಿಗಳು ,ಈ ಇಂಪಿನ ನುಡಿಯ ,

ಕಲಿವವರೆಲ್ಲಾ ಕಲಿಗಳು ,ಈ ಕೆಚ್ಚೆದೆಯ ಭಾಷೆಯ ,

ಬರೆವವರೆಲ್ಲಾ ಭಾಗ್ಯವಂತರು , ಈ ಹೊನ್ನಿನ ಕನ್ನಡವ ,

ಈ ಮಣ್ಣಿನಲ್ಲಿ ಹುಟ್ಟಿದವರೆಲ್ಲರೂ ,ಮಹಾ ಪುಣ್ಯವಂತರು ।।

ನೆಲೆಸಿ ಹರಿದಾಡಿಹುದಿಲ್ಲಿ ,ಮಹಾ ಮಹಿಮರ ವಚನಗಳು ,

ಹರಸಿ ನೆಲಸಿಹರಿಲ್ಲಿ ,ಮುಕ್ಕೋಟಿ ದೈವಗಳು ,

ಹಾಡಿ ಕೊಂಡಾಡಿಹ ,ಕನಕ ಪುರಂದರ ಕೀರ್ತನೆಗಳು ,

ಹರಿಯುತಿವೆ ಇಂದಿಗೂ ,ಕೃಷ್ಣೆ ಕಾವೇರಿಯೊಡನೆ ।।

ಯುಗ ಯುಗಗಳೇ ಕಳೆದರೂ ,ಸೂರ್ಯ ಚಂದ್ರರೇ ಕಳವಾದರೂ ಕರಗದೀ ಕನ್ನಡ ,

ಬಿಚ್ಚುಗತ್ತಿಯ ಕೆಚ್ಚೆದೆಯ ಗಂಡುಗಲಿಗಳ ,ಸಚ್ಚರಿತ್ರೆ ಸಾರುತಿಹುದೀ ಕನ್ನಡ ,

ಭಂಡಾಯ ಬಂದವರ ಸೊಲ್ಲಡಗಿಸಿ ,ಭಂಡಾರದ ಬೀಡನ್ನು ,ಬಲಗೊಳಿಸುವ

ಜಾಣರ ನೆಚ್ಚಿನ ಕನ್ನಡ ।।

ಸಾಟಿ ಏನು ಈ ನಲ್ಮೆಯ ಭಾಷೆಗೆ ,

ಸಾಲದಿನ್ನು ಸಹಸ್ರ ಕವಿಗಳ ಸಂಯೋಜನೆ ,

ಇನ್ನು ಏಳೇಳು ಜನ್ಮದಲ್ಲೂ , ಈ ಮಣ್ಣಿನಲ್ಲೇ ನಾ ಜನಿಸಲೆಂದು

ಆ ತಾಯಿ ಭುವನೇಶ್ವರಿಯಲ್ಲಿ ನನ್ನ ಸವಿನಯವಾದ ಪ್ರಾರ್ಥನೆ ।।

ನವೀನಸ್ಪೂರ್ತಿ

ಎಲ್ಲರಿಗೂ ಕನ್ನಡ ರಾಜ್ಯೋತ್ಸವದ ಶುಭಾಷಯಗಳು..

ಮನ್ವಂತರದ ಕವಿತೆಗಳು