ಆ ಬದಿಯ ಮಕ್ಕಳು

ಅಲ್ಲೊಂದು ಬೀದಿ , ಬೆಂಗಳೂರಿನ ಬೀದಿ ,

ಬೀದಿಯ ಆ ಬದಿಯ ಮಕ್ಕಳು ,

ದೊಡ್ಡ ಮನೆಯ ಮುಂದೆ ಆಡುತ್ತಿರುವ ಪುಟ್ಟ ಮಕ್ಕಳು ,

ದುಬಾರಿ ಗೊಂಬೆಗಳ ಬೀದಿಯಲ್ಲಿ ಚೆಲ್ಲಿ ಆಡುತ್ತಿರುವ ಮಕ್ಕಳು ,

ಮಿಣ ಮಿಣ ಹೊಳೆಯುವ ಬಟ್ಟೆ ತೊಟ್ಟಿರುವ ಮಕ್ಕಳು ।।

ಅದೇ ಬೀದಿಯ ಈ ಬದಿಯಲ್ಲೊಂದು ಗುಡಿಸಲು ,

ಆ ದೊಡ್ಡ ಮನೆಗಳ ಕಟ್ಟಲು ಬಂದವರ ಗುಡಿಸಲು ,

ಆ ಗುಡಿಸಲ ಮುಂದಿರುವ ಮಕ್ಕಳು ,

ಬೀದಿಯಲ್ಲಿ ಚೆಲ್ಲಿರುವ ವಸ್ತುಗಳಲ್ಲಿ ಆಡುತಿರುವ ಮಕ್ಕಳು ।।

ಒಂದೆ ಬೀದಿಯ ಆ ಬದಿಯ ಮಕ್ಕಳು ,

ಅದೇ ಬೀದಿಯ ಈ ಬದಿಯ ಮಕ್ಕಳು ,

ಒಂದೇ ಬೀದಿಯಲ್ಲಿ ಹುಟ್ಟಿದರೂ ಒಂದಾಗಿ ಆಡದ ಮಕ್ಕಳು ,

ಒಂದೇ ಕಡೆ ಇದ್ದರು ಬೇರೆ ಬೇರೆಯಾಗಿ ಬೆಳೆಯುವ ಮಕ್ಕಳು ।।

ವಿಭಿನ್ನವಾಗಿ ಜೀವನ ಮಾಡುವ ಮಕ್ಕಳು ,

ಏನು ಅರಿಯದೆ ಇದ್ದರೂ ಅಂತಸ್ತಿನ ಅಡಿಪಾಯದಲ್ಲಿ ,

ಅರಿಯದೆ ಅರಳುವ ಹೂವುಗಳು ,

ನಾಳಿನ ದೇಶದ ಭವಿಷ್ಯದ ಅಡಿಗಲ್ಲುಗಳು ।।

ಈ ಬೀದಿಯ ಎರೆಡೂ ಬದಿಯಲ್ಲಿ ಆಡುವ ಅರಳುವ ಮಕ್ಕಳು ,

ಇರಲಿ ಇವರೆಲ್ಲರಿಗೂ ಸಮಾನ ಅವಕಾಶದ ಮೆಟ್ಟಿಲು ।।

ನವೀನಸ್ಫೂರ್ತಿ

ಮನ್ವಂತರದ ಕವಿತೆಗಳು