ಸೃಷ್ಟಿ ಸಂಗೀತ

ಆನಂದದ ಆಲಾಪವ ಶುರುಮಾಡಿದೆ

ತಂಗಾಳಿಯು , ತಂಪೆರಚುವ ಈ ಸಂಜೆಗೆ ।।

ಗುಡುಗು ಢಮರ ಬಾರಿಸುತೆ , ಮಳೆಹನಿಯ

ಮೇಲಿಂದ ಚೆಲ್ಲಿ ಝೆಂಕಾರವ ಜೋಡಿಸಿದೆ ।।

ಝೆಂಕಾರದ ಈ ಪಲ್ಲವಿಗೆ ಏಕ ನಾದವ

ಹಿಡಿದಿದೆ ಜೀರು ಧುಂಬಿಯು ।।

ಧುಂಬಿಯ ರಾಗಕೆ ದನಿಗೂಡಿಸಿ

ಮಿಡಿಯಲು ಆ ಮಿಡತೆಯು ।।

ಮಿಡಿಯುವ ರಾಗಕೆ ಸ್ವರಗಳ ಸೇರಿಸಿದೆ

ಸರಿದಾಡುವ ಸರೀ ಸೃಪವು ।।

ಸ್ವರಗಳ ಪಲ್ಲವಿಗೆ ಚರಣವ ಶುರುಮಾಡಿದೆ

ಮಾವಿನ ಮರದ ಆ ಗಿಳಿಯು ।।

ಗಿಳಿಯ ಚರಣವ ಕೇಳಿ , ಕೊರಳ ಭಾವವ

ಬೆಸೆದು ಕೂಗಿದೆ ಈ ಕೋಗಿಲೆಯು ।।

ಕೋಗಿಲೆಯ ಕಂಠಕ್ಕೆ, ಕಲರವದ ನಾದವ

ನುಡಿಸಿದೆ ಹರಿಯುತ್ತಿರುವ ಆ ನದಿಯು ।।

ನದಿಯ ಜುಳು ಜುಳು ನಾದಕ್ಕೆ ,

ರಾಗ ವೀಣೆಯ ಮೀಟಿದೆ ಬಳುಕುತ್ತಾ ಬೀಳುತ್ತಿರುವ ಜಲಪಾತವು ।।

ಈ ರಮಣೀಯ ರಂಗೇರಿದ ಸಂಗೀತ ಸಂಜೆಗೆ

ನಾನು ಅತಿಥಿಯಾಗಿ ಬಂದಿರುವೆನು ।।

ಸೃಷ್ಟಿಯ ಅತ್ಯಧ್ಬುತ ಅನುಭವವ ಕಂಡು

ಮೂಕವಿಸ್ಮಿತನಾಗಿ ನಿಂತಿರುವೆನು ।।

ನವೀನ

ಮನ್ವಂತರದ ಕವಿತೆಗಳು