ಸರಿ ತಪ್ಪಿನ ಸತ್ಯ

ಸರಿ ತಪ್ಪುಗಳ ಸಾವಿರ ತುಲನೆಯ ಜೀವನ ,

ಸವಿಯಿಂದ ಕಹಿಯನ್ನು ,ಕಹಿಯಿಂದ ಸವಿಯನ್ನು ,

ಸವಿಯುವುದರಲ್ಲೇ ಏಕೆ ಸವಿಸುವೀ ಜೀವನ ।।

ಬಾಳಿನ ನ್ಯಾಯದ ತಕ್ಕಡಿಯಲ್ಲಿ ,

ಸರಿ ತಪ್ಪುಗಳ ತೂಕ ಮಾಡಿ ,ತರ್ಕ ಮಾಡಿ ಬದುಕುವೆ ,

ನೀ ಸರಿಯೆಂದು ಕೊಂಡಿದ್ದಲ್ಲ ಸರಿಯೇ ,

ಎಂದು ಯಾವ ತಕ್ಕಡಿಯಲ್ಲಿಟ್ಟು ತೂಗುವೆ ,ಹೇಗೆ ನಂಬುವೆ ।।

ಪುಸ್ತಕದಲ್ಲಿ ಯಾರೋ ಸರಿಯೆನಿಸಿ ಬರೆದುದಾ ,

ಇದೇ ಸರಿಯೆಂದು ಹೇಳಿದ ಬೈಗುಳವಾ,

ಇಲ್ಲವೆ ಎಲ್ಲರೂ ಸರಿಯೆಂದು ಒಪ್ಪುವ ವಾದವಾ ,

ಸರಿ ತಪ್ಪುಗಳ ಸಂಕಲನದ ಸ್ವಾಮ್ಯವಾ ।।

ಸರಿ ತಪ್ಪು ಎಂಬ ಎರಡೇ ಕಣ್ಣಲ್ಲಿ ನೋಡುವುದು ,

ಹುಟ್ಟು ಸಾವು ಎಂಬ ಎರಡೇ ದಿನದಲ್ಲಿ ಬಾಳಿದಂತೆ ,

ಸರಿ ತಪ್ಪಿನ ತೆಪ್ಪದ ಪಯಣದಲ್ಲಿ ಸರಿಯೂ ತಪ್ಪೆ ,

ತಪ್ಪೂ ಸರಿಯೆ ,ಇದರಿಂದಾದ ಹುಟ್ಟಿಂದ ,

ಹುಟ್ಟು ಹಾಕುತ್ತಾ ಜೀವನದ ನದಿಯ ದಾಟುವುದೇ ಸತ್ಯ ......

ನವೀನ

ಮನ್ವಂತರದ ಕವಿತೆಗಳು