ಹಬ್ಬದ ಅಬ್ಬರ

ದೀಪದ ಹಬ್ಬಕ್ಕೆ , ಇರುಳನ್ನೆಲ್ಲಾ ಬೆಳಕಾಗಿಸುವ ಹಬ್ಬಕ್ಕೆ , ಚಿಟ ಪಟ ಸದ್ದಿನ ಚಿನಕುರುಳಿ ಪಟಾಕಿ ಸೇರಿಸಿ ಮಾಡಿದ ಕವನದ ಪಟಾಕಿ ಆಲಿಸಿ

ದೀಪದ ಹಬ್ಬ

ಹೆಜ್ಜೆ ಹೆಜ್ಜೆಗೊಂದು ದೀಪವ ಇಟ್ಟು ,

ಮುಗಿಲನ್ನು ಬಾಣ ಬಿರುಸಿನಿಂದ ಹೊತ್ತಿಸಿ ,

ಎಲ್ಲರ ಬಾಯಲ್ಲಿ ಸಿಹಿಯ ಪಟಾಕಿ ಇಟ್ಟು ,

ಬಣ್ಣದ ಬಲಿಪಾಡ್ಯಮಿಯ ಆಚರಿಸೋಣ ಬನ್ನಿ ।।

ಚಿಟ ಪಟ ಸದ್ದಿನ ಚಿನಕುರುಳಿ ಪಟಾಕಿ ,

ಡಮ್ ಎಂದು ಸಾವಿರ ಹೋಳಾಗುವ ಲಕ್ಷ್ಮಿ ಪಟಾಕಿ ,

ಎಲ್ಲರ ಕಿವಿ ಗುಯ್ ಗುಟ್ಟಿಸುವ ಆನೆ ಪಟಾಕಿ ,

ಸರಸರನೆ ಸುಟ್ಟು ಸುರ್ ಎನ್ನುವ ಸರ ಪಟಾಕಿ ಹಚ್ಚೋಣ ಬನ್ನಿ ।।

ಸಂತೋಷ ,ಸಂಭ್ರಮ ಇಮ್ಮಡಿಗೊಳಿಸುವ ಹಬ್ಬವಿದು ,

ಈರುಳ್ಳಿ ಪಟಾಕಿ ಹಚ್ಚಲು ಅಪ್ಪನ ಕಾಯುವ ,

ಉಳ್ಳಿ ಪಟಾಕಿ ತೋರಿಸಿ ಅಮ್ಮನ ಹೆದರಿಸುವ ,

ತಂಗಿಯ ಕೈ ಹಿಡಿದು ಸುರ್ ಸುರ್ ಬತ್ತಿ ಹೊತ್ತಿಸುವ ಹಬ್ಬವಿದು ।।

ಹಬ್ಬದ ಆನಂದದಲ್ಲಿ ಮೈ ಮರೆತು ಆಡೋಣ ,

ಹೊಸ ಬಟ್ಟೆ ತೊಟ್ಟು ಮಿರ ಮಿರ ಮಿಂಚೋಣ ,

ಪಟಾಕಿ ಹೊಡೆಯುವಾಗ ಮಾತ್ರ ಎಚ್ಚರದಿಂದಿರೋಣ ,

ಎಲ್ಲರಿಗೂ ದೀಪಾವಳಿ ಹಬ್ಬದ ಶುಭ ಕಾಮನೆಗಳು ।।

ನವೀನ