ಮನಗಳ ಮರ್ಧನ

ಕೊಡಲಾರೆ ಕಣ್ಣೀರ ಧಾರೆ ,

ಕನಸಲ್ಲೂ ನೋಯಿಸದ ಮನಕೀಗ ,

ಹೊರಿಸಲಾರೆ ನೋವಿನ ಹೊರೆ ,

ಸಣ್ಣ ನೋವನ್ನೂ ನೀಡದ ಮನಕೀಗ ।।

ಭಾವನೆಗಳ ಕನ್ನಡಿ ಹೊಡೆದು ಚೂರಾಗಿದೆ ,

ಭವ್ಯ ಬಂಗಲೆಯ ಆಸರೆ ಸಿಗದೆ ,

ಕನಸುಗಳು ಹರಿದು ನೂರಾಗಿದೆ ,

ರೂಪಾಯಿಯ ಗದ್ದುಗೆ ಇಲ್ಲದೆ ।।

ಶುದ್ಧ ಹಾಲಿನಂತ ಪ್ರೇಮವು ,ಬೆಂದು ನಲುಗಿದೆ ,

ಭಯದ ಬೆಂಕಿಯ ಕೆನ್ನಾಲಿಗೆಯಲ್ಲಿ ,

ಪ್ರೀತಿಯ ಹಕ್ಕಿಯ ಗೂಡು , ಹೊತ್ತಿ ಉರಿದಿದೆ ,

ಅಂತಸ್ತಿನ ಆರ್ತನಾದದ ಮಳೆಯಲ್ಲಿ ।।

ಸಮಾಜದ ಕಟ್ಟುಪಾಡುಗಳ ಕಟ್ಟಡದಲ್ಲಿ ,

ಪ್ರೀತಿಯ ಇಟ್ಟಿಗೆಯ ಬೆಲೆಯು ತೃಣವಾಗಿದೆ ,

ಐಶ್ವರ್ಯದ ಅಂಜಿಕೆಯ ಜಗದಲ್ಲಿ ,

ಪ್ರೀತಿಯ ಅಶ್ವ ಹೆದರಿ ಮೂಲೆಗುಂಪಾಗಿದೆ ।।

ಮನದ ಮಧುರ ಮೈತ್ರಿಯ,

ಮಾನವನ ಕುರುಡು ಸಮಾಜ ,

ಕುರುಡು ಪ್ರೀತಿಯೆಂದು ಕಿತ್ತು ಹಾಕಿದೆ ।।

ಸಮಾಜದ ಕ್ರೌರ್ಯವಾದ ಜ್ವಾಲಾಮುಖಿಯು

ಮಧುರವಾದ ಮನಗಳ ಮರ್ಧನ ಮಾಡಿದೆ ।।

ನವೀನಸ್ಪೂರ್ತಿ

ಮನ್ವಂತರದ ಕವಿತೆಗಳು