ದೇವರ ದಾರ

ದೇವರ ದಾರ*

ದೇವರ ಗುಡಿಗೆ ಹೋಗುವ ಮುನ್ನ ನೋಡುವರು ನನ್ನ ,

ದೇವರ ಬೇಡಲು ಕೊಂಡೊಯ್ಯುವರು, ನಾ ಕಟ್ಟಿದ ಹೂವನ್ನ ,

ಎಲ್ಲರಿಗೂ ದೇವರು ಬೇಡಿದ್ದು ಕೊಟ್ಟ ,

ಎಲ್ಲರಿಗೂ ಬೇಡವಾದ ಹೂ ಮಾರುವ ಕಾಯಕ ನನಗೆ ಏಕೆ ಇಟ್ಟ ।।

ನಾನೇನು ಓದದ ದಡ್ಡಿಯಲ್ಲ , ಲೋಕ ಕಾಣದ ಪೆದ್ದಿಯಲ್ಲ ,

ಆದರೆ ನನ್ನ ಓದಿಸಲು ವಿಧಿ ಒಪ್ಪಲಿಲ್ಲ ,

ನನ್ನಪ್ಪನಿಗೆ ಅಮ್ಮನಿಗೆ ಕಾಯಿಲೆಯಾಗಿ ಬಂದು ನನ್ನ ಕೈ ಕಟ್ಟಿದ ,

ದಿನವೂ ಕೂತು ಹೂ ಕಟ್ಟುವಂತೆ ಮಾಡಿದ ।।

ನನ್ನ ಶಾಲೆಯ ಸಹಪಾಠಿಗಳು ನನ್ನ ಮುಂದೆಯೇ ಓಡಾಡುವರು ,

ನನ್ನ ಬಳಿಯೇ ಹೂ ಕೊಳ್ಳುವರು ,

ನಾ ಅಳೆಯುವ ಹೂವು ಸರಿಯುಂಟೆ ಎಂದು ನೋಡುವರೆ ಹೊರತು ,

ನನ್ನ ಮುಖವನ್ನು ನೋಡಿ ತಮ್ಮ ಗೆಳತಿ ಎಂದು ಗುರುತಿಸಿದವರಾರು ಇಲ್ಲ ।।

ಗುರುತಿಸಿದರೂ ಅವರ ಜೊತೆಯವಳೆಂದು ಹೇಳಿಕೊಳ್ಳಲು ಅವರಿಗೆ ನಾಚಿಕೆ ,

ನಾ ಹೇಳಿಕೊಳ್ಳಲು ನನಗೆ ಅಂಜಿಕೆ ,

ಓ ದೇವರೆ ನಾ ಕಟ್ಟುವ ಹೂವನ್ನು ಪಡೆದು , ಎಲ್ಲರ ಆಸೆ ಪೂರೈಸುವೆ ,

ನಿನಗಾಗಿ ಕಟ್ಟಿ ನನ್ನ ಹೊಟ್ಟೆ ಕಟ್ಟುವ ನನ್ನ ಆಸೆ ಎಂದು ಪೂರೈಸುವೆ ... ?

ನವೀನಸ್ಫೂರ್ತಿ

*ಈ ಕವನ ನೈಜ ಕಥೆ ಆಧಾರಿತ

ಮನ್ವಂತರದ ಕವಿತೆಗಳು